Gschicht und Infos zer Kääskepf Clique

Am 11. Auguscht 2009 hän sich 6 Wiehlmys zämme do und d`Kääskepf Clique grindet! Unter anderem hän alli Grindigsmitglieder kai Luscht me uff e Cortège gha und näbedraa hetts au no gwissi anderi Problem gä wo zue däm Entschaid gfiehrt hän.

Aktuell sinn mir 16 Aggtivmitglieder, dodervoo 2 Vordrääbler, 1 Tambourmajor, 6 Pfyffer und 7 Dambuure. Mir Iebe immer am Zyschdig Zoobe im Pfluderi Käller und pflääge dert unser Repertoire. Au leege mir sehr grosse Wärt uff e aständigs Niveau in Sache Pfyffe und Drummle!

Dr Namme Kääskepf kunnt doderhär, dass wo mir die Grubbe grindet hän, mir grad bim Hotel B gstande sinn, e Bier drungge hän und bi däm Käässchnitte Stand gstande sinn. Dangg däm Stand hetts nach Kääs gstungge und eso sinn mr zue däm doch e weeneli ussgfallene Naame ko!

Unser Wappe isch useme Jux entstande. Am eidgenössische 2006 in Basel sinn mir au e bitzeli go gässle und ains vo de Mitglieder vo dr Dambuuregrubbe hett gfunde das giengi gar nid ohni e riiiiese Fahne! Gesagt Getan, hett är uss dr Kombination Kääskepf und Wyybeeri (unser befrindets Pfyffergrippli damals) e Wappe gstaltet und das zer Fahne gmacht. Und irgendwie isch es jetzt bi däm Wappe bliibe!

Dr Logik halber muess me erklääre das d`Kääskepf Dambuuregrubbe scho 2004 grindet worde isch (innerhalb vo de Wiehlmys) und die Dambuure nur am Fasnachtszyschdig als Kääskepf gloffe sinn. Das mit em Ziel d`Fasnacht no ussgiebiger z`gniesse. E Joor speeter hän sich uss em gliiche Grund d`Wyybeeri Pfyffer grindet (au Wiehlmys). Dorum immer das änge Verhältnis unterenand. D`Kääskepf Clique isch denne aber nur uss dr Dambuuregrubbe use entstande.

An dr Fasnacht 2010 sinn mir denne s`erschte mol als Kääskepf Clique unterwäggs gsi, und me ka saage kaine vo uns hetts au nur ei Minute bereut! Es isch genau die richtigi Entschaidig gsi.

Nach dr Fasnacht 2012 hän mir als Clique beschlosse neyi Wäg z`goo! Mir befinde uns jetzt imene Ybergangsjoor zur Verainsgrindig. Nach dr Fasnacht 2013 wänn mir d`Kääskepf Clique als Verain grinde! Dodermit gitts ab sofort bi uns au e Ybergangsvorstand wo im Momänt eso ussgseeht:

Obmaa: Zoran Peric
Schryybere: Stefanie Niederberger
Seggelmaister: Philippe Moser
Zeremoniemaister: Tobias Moser & Denise Schumacher

Ämter usserhalb vom Vorstand:

Passivbetreuer: Andreas Hunziker
Musikchef: Philippe Moser
Larveverantwortliggi: Christina Altenbach

Wenn de uns willsch kontaktiere, denn schriib doch e e-Mail an

kaeskepf (a) gmail.com

Iebigsstunde

Jede Zyschdig
vom Viertel ab Achti bis Viertel vor Zäähni

im Käller vo de Pfluderi am Noodlebärg 18

Ab und zue dien mir mit unsere befrindete Ziigli iebe

In de Schuelferie dien au mir uns erhoole!